PERSÓNUVERND

HVAÐA UPPLÝSINGUM SÖFNUM VIÐ?

ALMENNT

Persónuupplýsingar eru hvers kyns upplýsingar um einstakling sem gera mögulegt að persónugreina hann, beint eða óbeint. Við söfnum einkum eftirfarandi persónuupplýsingum um þig:

• Tengiliðaupplýsingar, s.s. nafn, kennitölu, heimilisfang, tölvupóstfang og símanúmer.

• Sjúkraskrárupplýsingar, þ.m.t. sjúkrasögu, röntgenmyndir og stafrænar myndir, samskipti við aðra heilbrigðisstarfsmenn vegna meðferðar o.fl.

• Greiðsluupplýsingar.

Vissar tegundir persónuupplýsinga sem við söfnum, einkum sjúkraskrárupplýsingar, teljast til viðkvæmra persónuupplýsinga í skilningi persónuverndarlaga. Öll meðferð slíkra upplýsinga fer fram í samræmi við fyrirmæli laga um sjúkraskrár, persónuverndarlaga og siðareglna Tannlæknafélags Íslands.

HVERNIG SÖFNUM VIÐ UPPLÝSINGUM?

Við öflum tengiliðaupplýsinga frá þér í gegnum eyðublöð, síma, tölvupóst, eða með öðrum hætti. Við öflum heilsufarsupplýsinga frá þér og eftir atvikum öðrum tannlæknum eða öðrum heilbrigðisstarfsmönnum, auk þess sem við skráum upplýsingar um þá meðferð sem við veitum þér. Jafnframt höldum við utan um greiðsluupplýsingar og útgefna reikninga sem eru nauðsynlegar vegna samningssambands okkar og til að uppfylla skilyrði skatta- og bókhaldslaga.
Við notkun þína á vefsvæði okkar www.tannrettingastofan.is er vissum tæknilegum upplýsingum um notkun á vefnum safnað með notkun vafrakaka (e. cookies). Þessar upplýsingar eru aðeins notaðar af vefumsjónarkerfi okkar til að greina umferð um vefinn, stuðla að góðri og öruggri notendaupplifun og gera okkur kleift að bjóða þér aðstoð með netspjalli meðan þú skoðar vefinn. 

TILGANGUR VINNSLU OKKAR Á PERSÓNUUPPLÝSINGUM

Við vinnum eingöngu persónuupplýsingar þínar að því marki sem lög heimila. Helstu tilvik eru eftirfarandi:

• Til að halda sjúkraskrá í samræmi við fyrirmæli laga um sjúkraskrár nr. 55/2009 og til að uppfylla önnur fyrirmæli löggjafar um heilbrigðisstarfsemi;

• Til að efna samning okkar við þig um veitingu tannréttingaþjónustu;

• Til að gæta lögmætra hagsmuna Tannréttinga sf;

• Til að gæta hagsmuna þinna í tengslum við meðferð;

Við notum upplýsingar þínar eingöngu í þeim tilgangi sem var ástæða söfnunar þeirra, nema þörf sé á að nýta þær í öðrum tilgangi sem er samrýmanlegur upprunalegum tilgangi. Ef við þurfum að vinna upplýsingar í ótengdum tilgangi munum við upplýsa þig um þá vinnslu að því tilskildu að lög heimili.

​Tannréttingar sf nota hvorki persónuupplýsingar þínar í markaðsskyni né veitum við þriðja aðila aðgang að þeim í slíkum tilgangi.

MIÐLUN TIL ÞRIÐJU AÐILA

Í því skyni að uppfylla þann tilgang sem lýst er hér að ofan kann að vera nauðsynlegt að miðla persónugreinanlegum upplýsingum um þig til þriðju aðila. Slíkir aðilar geta verið ábyrgðaraðilar eða vinnsluaðilar eftir atvikum. Helstu dæmi um slíka aðila eru eftirfarandi:

• Aðrir heilbrigðisstarfsmenn, t.d. aðrir tannlæknar, læknar, sjúkraþjálfarar, tannsmiðir eða aðrir sérfræðingar;

• Þjónustuaðilar okkar, t.d. hýsingaraðilar UT-búnaðar og fjarskiptafyrirtæki;

• Ráðgjafar okkar, t.d. lögmenn, endurskoðendur og vátryggjendur;
  Innheimtufyrirtæki;

• Sjúkratryggingar Íslands, Embætti Landlæknis, vátryggingafélög, sjúkraþjálfarar, skattayfirvöld, yfirvöld s.s. lögregla og annað yfirvald s.s. barnavernd.

Við miðlum gögnum einungis að því marki sem nauðsynlegt er og heimilum þriðju aðilum ekki önnur not þeirra. Sjúkraskrárupplýsingum er einungis miðlað að því marki sem samræmist þagnarskyldu okkar sem heilbrigðisstarfsmanna og fyrirmælum laga um sjúkraskrár.

FLUTNINGAR TIL ANNARRA LANDA

Við flytjum engar persónuupplýsingar til landa utan Evrópska efnahagssvæðisins (EES-svæðisins).
Ef þú hefur kosið að fara í Invisalign meðferð kann þó að vera að Invisalign þurfi að vinna persónuupplýsingar þínar utan EES-svæðisins, þar sem Invisalign meðferð byggir á plastskinnum sem framleiddar eru erlendis eftir okkar fyrirmælum. Slík miðlun gagna innan Invisalign á sér eingöngu stað á grundvelli skriflegs samnings við þig um viðkomandi þjónustu. Í slíkum tilvikum er tryggt að flutningur gagna til landa utan EES-svæðisins eigi sér aðeins stað í samræmi við ákvæði þar að lútandi í gildandi persónuverndarlöggjöf.

ÖRYGGI PERSÓNUUPPLÝSINGA

Tannréttingar sf viðhafa viðeigandi öryggisráðstafanir í því skyni að hindra að persónuupplýsingar þínar glatist, breytist, verði birtar eða aðgangur veittur að þeim í leyfisleysi. Aðgangur að upplýsingunum er auk þess takmarkaður við þá aðila sem nauðsyn ber til og sem eru bundnir trúnaðarskuldbindingu.
Ef upp kemur öryggisbrestur sem hefur áhrif á persónuupplýsingar munum við tilkynna slíkt til Persónuverndar og eftir atvikum til þín eftir því sem lög mæla fyrir um.

HVE LENGI ERU PERSÓNUUPPLÝSINGAR GEYMDAR?

Um vörslu sjúkraskrárupplýsinga fer samkvæmt lögum um sjúkraskrár nr. 55/2009. Óheimilt er að eyða upplýsingum úr sjúkraskrá sjúklings nema með samþykki landlæknis.
Aðrar persónuupplýsingar geymum við aðeins svo lengi sem nauðsyn ber til í þeim tilgangi sem þeirra var aflað. Geymslutími slíkra persónuupplýsinga fer eftir eðli upplýsinganna og þeim lagareglum sem gilda um viðkomandi vinnslu persónuupplýsinga, t.d. skatta- eða bókhaldslöggjafar. Í einstaka tilvikum kann einnig að vera nauðsynlegt að geyma gögn vegna lögmætra hagsmuna Tannrétting sf, t.d. vegna deilumála.